Ayətullah əl Üzma Şeyx Bəşir Hüseyn Nəcəfinin (kölgəsi davamlı olsun) Diyalə şəhərindəki nümayəndəsi müqəddəs Kərbəla şəhərinin mərkəzində qadınlar üçün nəzərdə tutulmuş Kərbəla Hüseyniyyəsi binasının ikinci mərtəbəsinin tamamlanmasına və açılışına nəzarət edib.

Şeyx Harun Muhəmmədi deyib: “Bütün möminləri bu mübarək münasibət – imam Məhdinin (ə.f) imamətinin ona tapşırılması münasibətilə təbrik edirik. Allah-taaladan istəyirik ki, bizi onun vilayətində sabitqədəm olanlardan və onun şərəfli zühurunu həqiqi şəkildə gözləyənlərdən qərar versin.

O, həmçinin bildirib ki, ikinci mərtəbənin açılması mömin qadın zəvvarların dincəlməsi üçün mühüm bir imkan yaradır.

O əlavə edib ki, qadınlar üçün nəzərdə tutulmuş bu mərtəbənin istifadəyə verilməsi mömin qadınlara xidmət yolunda mühüm addımdır. Həmçinin onların dini məclislərdə və müxtəlif dini tədbirlərdə iştirak etmələri üçün münasib şərait yaradır. Allah-taaladan bu layihənin həyata keçirilməsinə töhfə verən hər kəsə uğur verməsini və bu işi onlar üçün dünya və axirətdə dəyərli bir azuqə qərar verməsini diləyib.

O, möminlərə xidmət istiqamətində işlərin davam etdirilməsinin, Hüseyniyyənin dini və ictimai fəaliyyətinin daha da gücləndirilməsinin vacibliyini vurğulayıb. Xüsusilə mömin qadınlara xidmət göstərilməsi və onların dini proqramlarda və tədbirlərdə iştirak etmələri üçün münasib məkanın təmin edilməsinin əhəmiyyətini qeyd edib. Bu məsələ, xüsusilə milyonlarla insanın iştirak etdiyi Ərbəin ziyarəti zamanı xüsusi əhəmiyyət daşıyır.