Ayətullah əl Üzma Şeyx Bəşir Hüseyn Nəcəfi (kölgəsi davamlı olsun) Qurban bayramı münasibətilə mübarək ofisində təbrikə gələn möminləri, ziyarətçi nümayəndə heyətlərini və rəsmi şəxsləri qəbul etmişdir. Nəcəful-Əşrəfdə keçirilən bu görüşdə həzrət bir sıra ata qayğısı ilə verilən tövsiyələr və mənəvi nəsihətlər səsləndirmiş, Allah-taala ilə möhkəm bağlılığın və Əhli-beytin (ə.s) yolu ilə getməyin əhəmiyyətini vurğulamışdır.

Hörmətli mərcəi-təqlid (kölgəsi davamlı olsun) görüş zamanı bildirmişdir ki, möminlər bu cür mübarək dini günlərdən itaət, təqva və özünüislah dərsləri götürməlidirlər. O, insanın öz söz və əməllərinə diqqətlə nəzarət etməsinin, nəfsini daim hesaba çəkməsinin vacibliyini qeyd etmiş, bunun davranışların islah olunmasına, səhvlərdən və azğınlıqlardan uzaq qalmağa kömək etdiyini vurğulamışdır.

Hörmətli mərcəi-təqlid (kölgəsi davamlı olsun)  əlavə etmişdir ki, insanın öz nəfsini səmimi şəkildə mühasibə etməsi haqqı tanımağın və Allah-taalanın bəndələri üçün bəyəndiyi doğru yolda addımlamağın əsas vasitələrindən biridir. O, möminləri bu böyük və mübarək fürsətlərdən istifadə edərək əxlaqi və insani dəyərləri möhkəmləndirməyə, dini məsuliyyət hissini daha da gücləndirməyə çağırmışdır.

Çıxışının davamında həzrət Peyğəmbəri-Əkrəmin (s) və onun pak Əhli-beytinin (ə.s) uca məqamına toxunmuş, Əhli-beytin (ə.s) İslam risalətinin həqiqi davamçıları və ümmətin hidayəti üçün doğru yol olduğunu bildirmişdir. O vurğulamışdır ki, onların yolu ilə getmək və mübarək həyatlarını özünə nümunə seçmək, Allahın əmrlərinə və İslam dininin hökmlərinə əməli şəkildə bağlılığın ən gözəl təzahürüdür.

Görüşün sonunda hörmətli mərcəi-təqlid (kölgəsi davamlı olsun) Allah-taalaya dua etmişdir ki, İslam ümmətini və bütün möminləri hər cür bəla və pislikdən qorusun, bu mübarək bayramı hamı üçün xeyir, bərəkət və səadət ilə yenidən nəsib etsin, bütün ibadət və əməlləri qəbul buyursun.