Ayətullah əl Üzma Şeyx Bəşir Hüseyn Nəcəfinin (kölgəsi davamlı olsun) Neynəva şəhərindəki nümayəndəsi Qubbə–Şrixan bölgəsində bu mövsüm keçiriləcək yay kurslarının başlanması üçün münasib şəraitin yaradılması istiqamətində fəaliyyətini davam etdirir. Bu kurslar yeniyetmələr arasında dini və mədəni maarifin inkişaf etdirilməsini hədəfləyən tərbiyəvi və dini proqramlar çərçivəsində təşkil olunur.

Seyid Əbdülməcid Musəvi demişdir: “Bu il də hazırlıq işləri davam edir ki, artıq altıncı ildir ardıcıl olaraq həyata keçirilən dini və tərbiyəvi missiyamız davam etdirilsin. Məqsədimiz imkanların məhdud olmasına və mövcud çətinliklərə baxmayaraq, yay kurslarının proqramlarını mümkün qədər çox oğlan və qız övladımıza çatdırmaqdır. Çünki biz müasir dövrün fikir və mədəniyyətini düzgün şəkildə qavraya bilən şüurlu bir nəslin yetişdirilməsinin vacibliyinə inanırıq".

O əlavə etmişdir: “Yay kursları yalnız tədris dərslərindən ibarət deyil. Bu kurslar şüurun formalaşdırılması, əxlaqi dəyərlərin möhkəmləndirilməsi, Qurani-Kərimə və Əhli-beytə (ə.s) bağlılığın gücləndirilməsi üçün hərtərəfli bir layihədir. Mövcud imkanlarımız çərçivəsində fəaliyyət dairəsini genişləndirməyə və nəzərdə tutulan bölgələrə xidmət göstərməyə çalışırıq. Çünki bunun gənclərin qorunması və bacarıqlarının inkişaf etdirilməsi baxımından böyük əhəmiyyəti vardır".

Seyid Musəvi bu tərbiyəvi proqramların uğurla həyata keçirilməsi üçün bütün səylərin birləşdirilməsinin vacibliyini vurğulamış, cəmiyyətin övladlarına xidmət etmək və dini-əxlaqi dəyərləri möhkəmləndirmək naminə bu mübarək vəzifədə çalışan bütün şəxslərə Allah-Taaladan müvəffəqiyyət diləmişdir.