نجف اشرف: مرجعِ مسلمين و جهانِ تشيع حضرت آيت الله العظمىٰ الحاج حافظ بشير حسين نجفي (دام ظله الوارف) 13 جمادي الاولىٰ تي، ٻيءَ روايت موجب حضرت فاطمه زهراء سلام الله عليها جي شهادت جي ڏهاڙي جي مناسبت سان، پنهنجي مرڪزي دفتر نجف اشرف کان حرمِ حضرت اميرالمؤمنين علي عليه السلام تائين نڪتل سالياني مرڪزي جلوسِ عزاءِ فاطميه جي قيادت فرمائي.

هن ماتمي جلوس ۾ حوزه علميه نجف اشرف جي فاضلن، عالمن، استادن ۽ طلاب سان گڏوگڏ مختلف اسلامي ملڪن مان آيل مؤمنن، عراق جي مختلف صوبن جي ماڻهن، قبائلي سردارن ۽ سماج جي مختلف طبقن سان تعلق رکندڙ ماڻهن وڏي انگ ۾ شرڪت ڪئي. ان موقعي تي شرڪت ڪندڙن غم ۽ سوڳ جي ماحول ۾ حضرت فاطمه زهراء سلام الله عليها جي مظلومانه شهادت جي ياد تازي ڪندي، اهل بيت عليهم السلام سان پنهنجي محبت، ولايت، وابستگي ۽ وفاداريءَ جي تجديد ڪئي.

مرجعِ عالي قدر (دام ظله الوارف) عزاءِ فاطميه جي اهميت کي اجاگر ڪندي، ان کي اهل بيت عليهم السلام سان وفاداريءَ جي تجديد ۽ حقيقي دينِ محمديءَ سان وابستگيءَ جي اظهار جو هڪ اهم ذريعو قرار ڏنو.

ٻئي طرف، مرجعِ عالي قدر (دام ظله الوارف) جي فرزند ۽ مرڪزي دفتر جي مدير، محترم شيخ علي نجفي (دام تأييده)، پنهنجي بيان ۾ فرمايو ته هي جلوس ظلم، ناانصافي ۽ دهشتگرديءَ کان بيزاريءَ جو اعلان، حق ۽ انصاف جي راهه تي ثابت قدميءَ جو عزم ۽ حضرت فاطمه زهراء سلام الله عليها تي ٿيل مظالمن جي ياد تازي ڪرڻ جو هڪ نمايان مظهر آهي.