Ayətullah əl Üzma Şeyx Bəşir Hüseyn Nəcəfi (kölgəsi davamlı olsun) İraqda Əhli-beyt imamlarının (ə.s) müqəddəs hərəmlərini ziyarət etmək üçün gələn Afrika qitəsində yerləşən Fil Dişi Sahilindən olan təbliğçilər heyətini qəbul etdi.

Görüş zamanı o həzrət nümayəndə heyətini bu böyük tövfiq münasibətilə təbrik edərək bildirdi ki, İraq mübarək bir diyardır; çünki burada Əhli-beyt imamlarından (ə.s) altısının müqəddəs məzarları yerləşir. Bu isə İraqı hidayət çırağına, mömin qəlblərin sığınacağına və dünyanın müxtəlif yerlərindəki sevənlər və mövlalara mənəvi bir mərkəzə çevirir.

O həzrət, həmçinin Həzrət Peyğəmbəri-Əzəm Muhəmmədin (s) şəhadətini yada salaraq, Həzrət Əmirul-möminin imam Əlinin (ə.s) və xanım Fatimətuz-Zəhranın (s.ə) onun şəhadətindən sonra üzləşdikləri böyük müsibətlərə toxundu. Onların dinin əsil, həqiqi Muhəmmədi yolunu qorumaqda və İslamı azğınlıq və təhrifdən müdafiə etməkdə oynadıqları böyük rolu vurğuladı.

Görüşün sonunda hörmətli mərcəi-təqlid (kölgəsi davamlı olsun) Afrika qitəsindəki təbliğçilərin səylərini təqdir edərək, onların Əhli-beyt (ə.s) maarifini yaymaq, insanları haqq və düzgün yola yönəltmək istiqamətində göstərdikləri mübarək fəaliyyətlərini bərəkətli hesab etdi. O, bildirdi ki, bu xidmət böyük bir missiyadır – dinə yardım, həmçinin Muhəmmədi dəyərlərin insan cəmiyyətlərində möhkəmləndirilməsi deməkdir.