Ayətullah əl Üzma Şeyx Bəşir Hüseyn Nəcəfinin (kölgəsi davamlı olsun) Bəsrə şəhərindəki nümayəndəsi Deyr qəzasında fəaliyyət göstərən bir sıra Hüseyni mokib və heyətlərinin rəhbərlərini Aşura qiyamının yaşadılmasına göstərdikləri böyük dəstək və xidmətə görə təltif edib.

Təltif mərasimində çıxış edən Şeyx Müsənna Rübei deyib: "Hüseyni əza məclisləri ilə birbaşa əlaqə saxlamağa xüsusi önəm veririk. Çünki bu məclislər Əhli-beytin (ə.s) prinsiplərinin cəmiyyətdə möhkəmlənməsində mühüm rol oynayır. İmam Hüseynə (ə.s) ixlasla xidmət edən hər bir kəsə ehtiram əlaməti olaraq bu müqəddəs Qurani-Kərimi hədiyyə edirik. Həqiqətən, Seyidüş-Şühədanın (ə.s) xidmətində olmaq böyük şərəf və eyni zamanda böyük mənəvi məsuliyyətdir".

O bildirib ki, Hüseyni əza məclisləri yalnız Aşura hadisəsini yad etmək üçün təşkil olunan toplantılar deyil, həm də insanların dini şüurunun, imanının və əxlaqının formalaşdığı bir məktəbdir. Şeyx bu məclislərin təşkilatçılarının bütün səylərini yüksək qiymətləndirərək, Uca Allahdan onların bu mübarək xidməti davam etdirmələrini, Hüseyni məramın və islahatın, haqq mesajının yayılmasında onlara müvəffəqiyyət nəsib etməsini diləmişdir.

O, həmçinin qeyd edib ki, səfər çərçivəsində imam Hüseynə (ə.s) xidmət sahəsində fəal rol oynayan və Muhərrəm ayı günlərində dini-mənəvi dəyərlərin möhkəmləndirilməsinə töhfə verən bir sıra Hüseyni əza məclislərinə müqəddəs Qurani-Kərimin nüsxələri hədiyyə olunmuşdur.